Die waarnemende minister van Polisie, professor Firoz Cachalia, het sy vertroue uitgespreek in die vermoë van die waarnemende nasionale polisiekommissaris, luitenant-generaal Puleng Dimpane, maar vrae bly bestaan oor die werklike toestand van polisiëring in Suid-Afrika.
Cachalia en Dimpane het gister voor die parlement verskyn waar hulle die Suid-Afrikaanse Polisiediens (SAPD) se planne en uitdagings uiteengesit het. Cachalia het gesê hy is oortuig dat Dimpane die land sal wys dat sy in staat is om die polisiediens doeltreffend te lei.
Dimpane het aan die parlement gesê dat die SAPD beoog om meer hulpbronne na grondvlakdienste en sigbare polisiëring te verskuif. Hierdie stap word as noodsaaklik beskou, aangesien baie Suid-Afrikaners kla oor ’n gebrek aan polisie-teenwoordigheid in hul gemeenskappe.
Daarby plaas Dimpane se aanstelling as vrou in dié pos die kollig nog skerper op prestasie eerder as simboliek. Suid-Afrikaners is reeds teleurgestel deur ’n lang lys manlike voorgangers wat nie daarin kon slaag om misdaad doeltreffend hok te slaan nie. Die vraag is dus nie of sy ’n vrou is nie, maar of sy werklik die politieke wil, leierskap en ruggraat het om te slaag waar ander misluk het.